terça-feira, 27 de janeiro de 2009

Janeiro


Retratos de San Pedro, sacados por Celso Martins, nun die de niebe
( L Tumbeirico i Las Eiras)


An Janeiro, chube-te al outeiro:
se bires berdegar, pon-te a chorar
se bires terriar, pon-te a cantar!



"Primeiro vem Janeirinho
todo branco, cor de arminho..."


Este bersico fui you qu'al dixe nun tiatro que fazimos, éran ls meses de l anho, i you era Janeiro, iba bestida de prieto i apuis punírun uns farrapicos branquicos a repersantar la niebe.
Éran las nuossas porsoras que mos ansinában, de nuite, a la lhuç de la candeia, ls papeles éran eilhas qu'als screbien i nós toca a meter todo na cabecica i la tabuada nun podie quedar para trás - i graças a Dius i a eilhas, you inda la sei hoije.
Apuis, naquel tiempo, nebaba muito, gelaba anriba, mas nós nun arredábamos pie, eilhi certicos, c'als papelicos na mano, bien seguricos, se nó benie l aire i alhá íban eilhes. I se algun se lhambraba de ir a la bolada, yá nun íbamos para casa sien mos regelarmos más.
Apuis alhá staba mie mai, cun la torrada ountada cun unto ou cun aquel molhico de las tabafeias, quando stában berdes, era nua sartiana que se calcien i aquilho aporbeitaba-se todo... i buono que era! Íbamos pa la cama i drumiamos-mos cumo uas piedras!

I agora? C'la barriga chena dal que ye buono, i adonde stá l suonho?! Naide l perdiu, por isso you nun l ancontro.


Albertina São Pedro


2 comentários:

vladéfoda disse...

e aqui no brasil faz umj calor medonho

Amadeu disse...

Buonas nuites, Albertina,

Bengo eiqui mais ua beç solo para dezir que gusto muito de ls buossos testos. Cuntinai, que nunca deixarei de bos fazer cumpanha.

Amadeu Ferreira