La fiesta de l Sagrado Coraçon de Jasus era la cousa más linda! Las jinelas i barandas cun las colgaduras de colchas de seda i de l que habie!
Pa'ls ninos nun habie eigual!Ampeçábamos muito tiempo antes, a la doutrina. Sabiemos todo: Padre Nuosso, Ab'Marie i todo.
Apuis, aquel die, a la purmanhana, la garotada toda a apanhar flores, folhicas de Nuossa Senhora, hourtemisa, yedras, al que ancuntrábamos, strampalhábamos-las na rue i faziemos uns arcos.
Apuis, chegaba la hora de la missa, alhá íbamos nós a bestir las cruzadas. Tamien se bestien de anjo alguns garotos, you inda fui d'anjo alguns anhos, c'uns bestidicos brancos, c'uas alas por trás, uas chinelicas que mie mai me fazie de papelon i uas tiricas de farrapo branco.
Apuis ponien dous anjosa pegar nua toalha branca i outro iba a buscar als garoticos a quemungar.
Cantában uns bersicos mi lindos, éran assi, bou a screbir un:
Vinde, oh meigas criancinhas!
Vinde, vinde eu sou Jesus.
Vós sois minhas, muito minhas,
i por vós morri na cruz!
É Jesus quem nos convida
escutemos Sua voz
amiguinho das crianças,
fui criança como vós!
.
Ne l fin, ye que era! La nuossa porsora era mi buona, mandaba cozer un saco de pan, naquel tiempo habie panadeiras, era tie Marie Moça que fazie un pan cumo al sol, fazie uns moletes, i ne l meio queijo de cabra... ficábamos eilhi cunsoladicos!
Tamien mos dában ua Santica, que inda hoije las guardo!
Albertina São Pedro
Sem comentários:
Enviar um comentário